The following is from the 1903 Pennsylvania German.  I've changed Miller's spelling (orthography) to comply with the recent Buffington-Barba standard.





Viel Yohr lang hen sie alle Yohr en Battalye gehalte, wie in Lebanon, Hamburg, Kutztown, Boyertown, un so Blatz.  Die Soldaade sin ausgetornt un sin hin un her gemartscht.  Sell waar als en grosse Zeit.  Die Leit vun die ganze Gegend, un apartich die grosse Buwe un Meed, sin an's Battalje gange.  Die Meed un Buwe hen mehner drumm gewwe enanner zu sehne wie die Soldaade zu sehne.  Die Buwe hen die Meed zu Grundniss un Pretzels getriet un sin mit nanner die Schtress uff un abgeloffe.  Die Werth hen als en grosse Bisness geduh, apartich am Bar.  Sie hen als Woche lang vorhaer in die Zeitunge bekannt gemacht, dass sie en grosser Stock Whiskey eiglegt hatte, un hen die Leit hatzlich eigelaade, an's Battalye zu kumme un ihr Whiskey zu drinke.  Die Leit hen aa gut gefolgt.  Vormiddaags sin die Soldaade rum her gemartscht un Nochmiddaags hen viel vun ihne gholfe die Werth ihr Whiskey aus dem Weg zu schaffe.  Oweds hen viel nimme graad laafe kanne.  Es waar als en machtige Sauerei gewesst.  Die Werth hen Geld gemacht un viel Leit hen des Luderlewe gegliche.  In Reading hot bei so erne Battalye en gewisser Offizier zu viel in die Naas griegt, so dass er die Penn Stress uff un ab geridde iss un hot gemehnt er waar der Napoleon.  Er iss lang nochderhand unner dem Naame Napoleon gange.

Noch dem Grieg iss das alt Milizwese abgeschafft worre un die Battalje waare ausgeschpielt. Awwer doch net ganz.  An deel Platz hen sie die Battalye vorghalde, wann sie aa yuscht en paar alte Soldaade ghatt hen.  Die Fakt iss, dass sie bis en paar Yohr als noch Battalye ghatt hen in Hamburg un Kutztown ganz unne Soldaade.  Die Werth hen sie uff griegt.  Frieher hen sich die Soldaade gebt im Handle vun die Flinte, awwer bei die letschte Battalye hen sich die Leit gebt im Handle vun die Whiskey Glesser.  Es waar en Frahd un Humbug.  Wann der Deiwel en gude Bisness hot, gebt er net leicht uff.  Awwer endlich iss die Lumberei doch ausgeschtorwe.  Wann die Werth aa ken Flower uff die Hut gedraage hen, so waare sie doch traurich im Hatz.

Mit dem Battalye hot's en schpassicher Mistake gewwe wie ich en yunger Bu waar.  Mei Daadi hot oft in der Familye verzaalt dass er dobei waar wie der erscht Mann in Lebanon Kaunti gehenkt worre iss.  Es waar der Jimmy Quinn, der sei Fraa dotgemacht hot.  Die Soldaade waare ausgerickt un waare im Ring gschtanne fer die Leit zereck zu halte.  Das erscht Mol iss der Schtrich verrisse un der Jimmy iss uff die Bodde gefalle.  Sie hen ihn noch emol nuff gschnellt un sell hot ihn gesettelt.  Ich hab die Schtori oft geheert un hab die Noschen griegt, es waar en Battalye gwest.  Deel Yohre schpeeder hab ich mit noch Lebanon an's Battalye geh daerfe.  Des waar eppes Wunnerbaares, wie ich of course mei Lebbdaag nix gsehne hab ghatt.  Do sin die Soldaade uff un ab gemartscht un ich hab mit grosser Freed fer die Haaptsach gewaart.  Endlich sin die Soldaade in en Feld gange, hen ihre Flinde geschtackt un hen en Vacation gnumme.  Sell hot mich net gesuht un ich hab mei Bruder gfrogt: "Wu iss dann der Kall, wu sie uffhenke wolle?"  Der hot hatzlich iwwer mich gelacht.  Ich hab gemeent, sie dahte allemol bei erne Battalye epper uffhenke.  Ich hab gemeent, sell waar en Schtuck vum Program.  Ich hab mei Mistake viel Yohre lang hore misse.    D. M.